早前幫一位朋友睇咗個人星盤，佢嘅命格係適合經營一啲不被看見，甚至係被睇唔起嘅事業，就如佢想開嘅清潔公司。

基本上人人都好怕被睇唔起，覺得咁係奇恥大辱，非努力將其打臉不可。但隨著我經常幫有緣相聚嘅朋友免費分析星盤，發現原來並非必需如此，而且咁都可以係一種優勢。

首先，清潔等工種一向係工商住嘅必需服務但又普遍被睇低嘅行業，利潤甚大、競爭較小，生存成本比起一向被睇重嘅飲食、服務及零售等必需建造漂亮門面嘅行頭更加低。只不過係因為社會觀感有差，需要嘅起動資金、守業成本已經可以比其他人低。

其次，所謂「槍打出頭鳥」，被睇唔起嘅人事物好多時就即係不被看見。喺今時今日法律日益繁雜而罰款多多嘅香港，咁都代表咗風險成本比起常被看高嘅金融、法律及商貿等業者更少。

「由低做起」係好多人都不願意跨越嘅心理關口，尤其是學歷高、出身好嘅人，亦有好多家長不論貧富都會希望仔女會「出人頭地」。但當時代轉變，從事經濟活動嘅風險與成本比起往日更加高嘅時候，一向不被看見或被睇低嘅行業反倒更為安全，甚或會有更大收益。

對於個人生涯規劃，我哋係時候放低傳統框架，只論成效，不論觀感，咁就可以搵到更多隱藏地下嘅新機會。講到底，都係一個問題：「面子幾錢一斤呀？」

最後，補充一點，我幫朋友睇星盤係一定免費嘅原因係，對方一旦俾咗錢，就會期望我去答一啲類似「幾時有拖拍？」仲有「事業運幾時最旺？」等問題。但我係唔會想咁答，唔係因為真係睇唔出，而係答咗都無用，只會幫對方去搵到今生嘅生命議題並鼓勵佢去進行靈魂演化，自己搵方法去應對各種先天與後天所有嘅障礙。夾硬趨吉避凶，對個人成長係絕對無益兼而有害。

作者：辣椒F

想法和做人都是小辣椒，涉獵不同有趣圈子，對人生規劃和世事處理有獨到的一套看法。