今日有位同我同齡嘅熟客，佢同我哋講咗佢自己嘅生涯規劃：「我做到個身體咁樣，就係為咗一年後，想開studio、買到樓同埋結婚生仔，因為呢啲嘢都係我細細個就已經好想做到。」仔 細一問，佢嘅執行細節及整體計劃都非常浪漫動人，危機重重到毛管戙果種動人。

佢有一種焦慮，必需喺某個時間達成某個目標嘅焦躁。驅動佢去狂做、不顧自己健康危機都要死做嘅，就係極大嘅焦慮。當我同我媽一齊痛訴過去3年抗疫政策及大環境對我哋小商戶構成嘅毀滅式打擊時，佢先驚覺本身嘅構想個隱憂有幾大。

我同佢講：「創業、工作、結婚、買樓、生仔，呢五樣裡有一樣唔掂都足以令人崩潰，何況你仲全部一齊嚟，萬一全部出事咁你咪死？仲有，生意失敗的一課，我係喺派錢一萬時用嚟做早餐生意做到輸哂咁換返嚟，但同一件事，我個表親就用咗一百萬。」實情我就係問緊佢：「你知唔知自己做緊啲乜？」好明顯佢係唔知，咁係由於焦慮已經使佢無咗求真求證嘅動力。

講到焦慮，午餐時同呀媽食飯吹水，佢講返我知，我呀嫲臨終時好後悔自己對我哋唔好。我話，「咁係因為佢青春期腦部仲係發育時期就要忍受香港淪陷嘅歷史創傷，喺咁恐怖嘅極端環境裡求生，到佢正式成人嘅時候，已經無辦法返轉頭。少少唔啱都會造成應激反應，即時就會發癲。但呢啲唔係佢嘅錯，因為所有人喺咁嘅情況下都一定會痴線。」

「我之所以覺得Dr. Frankl 真係一個世界偉人，就係佢作為集中營倖存者，日日發癲鬧人完全係天經地義嘅事，無人有資格怪佢，但佢依然選擇喺集中營裡忍受咁恐怖嘅痛苦，克服絕望，發表影響精神醫學歷史嘅一切研究，令呢啲疾病都能夠有一啲醫治嘅方法。」

跟住又講到：「我幼年時成日聽佢同爺爺大吵大鬧，腦前額葉嘅神經細胞都係有80%機率係會即時死亡，所以我嘅情緒自制力極差，都係後天努力得嚟。仲有我成日要忍受精神打擊，同埋隨時要完成好多突然其來地打斷我嘅不合理要求咁樣而造成嘅應激反應，都係會令我嘅專注力、社交能力大大降低，所以你見到嘅我就係後來去做嘅自我訓練個成果。」

查實我到今日都仲間中會有over-reaction 嘅問題，尤其是精神狀態不佳嘅時候，我後天所訓練嘅自制力係有可能會突然失效，尤其是自覺安全嘅情況下。

不過，我要做嘅就唔係夾硬提升，咁只會再度增加焦慮，令問題更為嚴重，而係要接受它。使其作為生命花園裡嘅一個缺憾，將它擺好之後再撒啲種子，等回春雨露嘅新芽成長後，變成融入四周嘅美物。一切都需要時間。

忙，唔係懶於思索人生問題嘅借口，咁就會無法超越現有嘅困境，導致一世被呢個困境困住。咁樣，就唔係純粹運氣問題。俾自己時間去休息與消化，慢慢接受自己會有嘅不完美，欣賞咁努力嘅自己，就係我用嚟對抗極端焦慮嘅最佳方法。

「咁多人死唔見你死」係我已故嫲嫲嘅金句，但在今日嘅我而言，係一種無上讚美。因為咁係代表咗上主揀選咗我去經驗呢一切嘅痛苦而又得以重生，使我喺其中去得到更大嘅個人實力去為世界嘅改變作出貢獻。

作者：辣椒F

想法和做人都是小辣椒，涉獵不同有趣圈子，對人生規劃和世事處理有獨到的一套看法。