近一星期以嚟，由於COVID 又一次大爆發，導致中國大陸出現搶藥潮。其後有網紅帶貨，吹水話艾香可以殺死病毒、把毒迫出體外、即時好返云云，民眾便瘋搶艾香而致市面斷貨，價格暴漲十幾倍。淘寶天貓等賣家及有關廠家都話要年後發貨，呢段時間會加急生產及包裝，相信農曆年後價格不僅會回落，更會大跌。

我手下有一位老醫師，佢一年幾前曾經被一對騙徒夫婦搭上，話發展艾草田會有好大嘅利潤，因為艾草就係covid剋星。

的確，艾草燒出嘅煙係有機無害之餘仲對人體有益嘅空氣消毒劑，亦可透過吸入鼻腔喉嚨而滅除上呼吸道嘅部分病毒，稍為減輕免疫系統嘅負荷。不過艾香就係只能消滅部分飄浮空氣中嘅病毒，以及減低中招風險、升提陽氣對抗寒邪，並無消滅體內病毒嘅功能。

艾香主要用於養生、輔助中醫理療，所以呢啲網紅以失實廣告去引導恐慌之中嘅群眾去哄搶，除咗係罔顧他人生命安危，仲擾亂市場，為需要用到艾香嘅業者帶嚟極大不便，甚至係打擊，係極度不負責任嘅缺德行徑。

講返艾草田，佢哋最後無堅持去種植艾草，係因為前者想即時獲利，後者只想呃錢。當時老醫師仲經常禱告，希望神保守艾草田嘅生意。令我震驚嘅係，神的確有保守到呢項生意：如果佢哋唔係為咗短期利益，而係認真地耕田種艾草，咁就剛好會喺此時有農作收成，可以透過是次熱潮而賣出製成艾香之原材料並獲得暴利。

現今好多人都想輕易發財，紛紛以上述果種網紅為學習楷模，但我係相信有上帝，喺呢件事上更體會到創世紀裡嘅至理名言：

「你必汗流滿面才有食物可吃，直到你歸了土地，因為你是從土地而出的。」

就喺生涯規劃上，人就係應該腳踏實地咁去做事，只要有節奏地慢慢做好事業，為社會生產實際物質與知識經驗、為大眾提供良好嘅服務。一切嘅規劃，個重點唔係規劃，而係實現規劃嘅長時間堅持。

物極必反，過度發展嘅空洞娛樂必定會反噬全球，當大家都開始倒過嚟追求實際有用嘅嘢時，就係準備好嘅我哋去展現實力並得到應有尊榮嘅時候。

作者：辣椒F

想法和做人都是小辣椒，涉獵不同有趣圈子，對人生規劃和世事處理有獨到的一套看法。