三年疫情，最近終於復常，但唔少人都開始擔心新解封嘅內地自由行會過嚟搶購民生物資，以及因為之前嘅種種抗疫政策而蒙受不同程度嘅損失，大多數人都突然要活喺一個壓迫感好強嘅大環境裡面。

好多人都唔適應呢種被壓迫嘅日子，係因為佢哋從來無真正地活喺一個被壓迫嘅環境裡面。但咁並唔係一件最壞嘅事，更壞嘅係，一個人覺得自己慘、容許自己慘落去，再以此作為行惡害人嘅借口。是故，學識點樣去過被壓迫嘅生活，就係大家嘅當務之急。

首先講吓我點解會識得咁做，就係因為我細個時就係一個受人注目嘅異類，天然地活喺一個被多數人壓迫嘅大環境裡。佢哋會毫無理由咁排斥我，又會不停放大我嘅缺失，只要搵到少少錯處就會加以攻擊。例如，經常被老師借小事向家長大肆批評；喺中學時，因為參加公民活動而被排擠、講閒話。

當人處於一個如此動輒得咎嘅大環境，首先要做到嘅就係冷靜，即使情緒爆炸，當刻都要表現冷靜。外在影響內在，人就自然能夠更冷靜地睇清楚各種狀況，然後作出有利生存嘅選擇。

好多人都唔習慣去抑壓憤怒，有乜都要爆哂出嚟，所謂嘅弱弱相殘，都係由於人要將呢種被壓迫嘅憤怒，急不及待地拋到更加無力反抗嘅人身上。事實上，當人唔識得去控制表面上嘅情緒，就會經常結怨，為自己已經夠哂不利嘅逆境埋下更多不定時炸彈。

要解決嘅話，有一個好老土但又非常有用嘅方法，就係必須要求自己去做到最好，有能力就一定要去幫人。

有云：「我都已經被壓迫到抖唔到氣，仲搞啲咁嘅嘢？！」無錯，因為呢個係吸引力法則，為人負面又黑心孤寒，吸引返嚟身邊嘅就只會係呢種人；相反，積極正面而善良正直嘅人，自然會有同類嘅人主動接近，得道多助。

如果唔滿意個環境，覺得個環境壓迫我，就應該主動去改變環境。第一步，就係由自身思想行為開始，先唔好俾自己成為壞嘅一部分。第二步，自然就係將自己變成好嘅一部分。第三步，就係將自己嘅好推及他人。

立法會議員謝偉俊講過，「搶人才」太粗俗，下下要搶要打同內地無分別。所以點解香港一向比內地好？就係因為香港人一向反對用傷害他人嘅方式嚟取得資源。同理，我哋現今嘅大環境即使大大改變，順境變為逆境，都應該保持返「同舟人誓相隨」嘅光榮傳統。

今時今日嘅世界瞬息萬變，個人生涯及團隊規劃未必真係能夠完全照本宣科，所以就更加需要鍛煉出更加強健嘅心理狀態，去面對未來未知嘅更多新衝擊。

作者：辣椒F

想法和做人都是小辣椒，涉獵不同有趣圈子，對人生規劃和世事處理有獨到的一套看法。