最近的占星推播都非常聳動，唔係話有「凶星」，就係「N個星座連衰N日！」沉迷趨吉避凶，即係拒絕成長，懶於做好生命功課，所以最終都係要面對「厄運」。

對於個人生涯，所謂嘅「衰」，好多時就係發生一啲規劃及期望以外嘅負面事件。咁就係人要喺逆境之中學習新事物嘅時候，同考試之前要溫習操練、考嘅時候要專心作答過關，係一樣嘅道理，人生根本無可能日日都係無憂無慮嘅暑假。

順利與逆境，在於人心。當我用「學習」嘅心態去看待逆意嘅人事物嘅時候，主觀感覺就忽然開始順利。因為心態變咗，行事作風都會改變，被吸引而來嘅身邊人都越來越好，同時都會引來一啲有需要被幫助嘅人，然後又可以一齊共同成長。

最近都有睇到一篇文章係講古玩收藏*，其中一段係非常值得我哋好好細味：

//世上，絕少事物，是沒有瑕疵的；只看到瑕疵，看不到好處的人，不會快樂，也不會讓身邊的人快樂。蜜蠟大師和我去買蜜蠟，他專挑有疤痕和裂紋的，「天殘地缺，我最喜歡了。」大師認為：「東西越老，像人一樣，越多傷痕，你不可能既要這件東西有歲月帶來的『內涵』，又完好無損。」大概這麼想，人，才會活得順心。 //

我哋要規劃個人與團隊路線，最終嘅目的都係要獲得快樂生活，贏得自我及社會認同。學懂去欣賞「缺憾美」，人生中嘅不完美與遺憾、逆意之事、傷痛疤痕，就係滋養個人內涵嘅養份。

認知到呢一點，就好容易會接受到不足與瑕疵，將自己由完美主義嘅囚籠裡解放出嚟，唔再認為果啲難睇嘅過去係應被掩飾嘅醜態，繼而獲得自在與快樂。

作者：辣椒F

想法和做人都是小辣椒，涉獵不同有趣圈子，對人生規劃和世事處理有獨到的一套看法。