減肥呢個詞語，我細細個就已經聽啦。自從發達地區嘅人可以輕易得到熱量以嚟，肥瘦所代表嘅正反意義就倒轉咗。

早前外媒有報導*，厄瓜多爾有一名年輕女子於健身時猝死，死前向左望咗一下，咁就引起咗廣泛討論。

就我觀察，佢身材肥腫，做健身明顯都係為咗減肥，但卻因此猝死，係因為仲未建立好基礎就去追求完美。個人生涯規劃亦是如此，不能本末倒置，更加唔可以忽略身心受創時所發出嘅警號。

先講返呢位猝死女士，佢後頸係有好大個富貴包、全身硬脹，咁就係會增加中風/猝死嘅風險。由於頸部血管被冷硬肌肉阻塞，運動後血壓血流急劇改變，血液忽然上唔到腦，就係其中一個致命因素。常常飲食冷凍、吹大冷氣係元凶，改變習慣能救自己一命，亦可以大大減輕痛症。

好多肥人做運動減肥好多時會堅持唔住，係因為仲未清走啲病氣餘毒、疏通經絡、補充血氣，就急住做高消耗嘅運動。肥唔代表身體充滿養分，反之，係積聚咗好多毒水及代謝物等垃圾。強烈不適唔係一種必需用意志力嚟克服嘅困難，而係身體頂唔順嘅警號，必需即時停止，甚至求醫。

身體肥腫只係外在病癥，受寒、體虛、脾濕等病灶及情緒不穩、過勞、睡眠質量低下之類嘅內因，先至係重點。要減肥，先要調理好整個身體機能，然後先能夠安全地追求更好嘅體態。

同樣道理，放喺個人生涯規劃亦是如此，首先要清楚了解自己嘅條件、優點與缺點，而呢種了解都應該與時並進，建立好認知上嘅基礎之後，先至係去追求完美。

兩日前同一位新朋友討論過，如何理解以上嘅嘢，以及將缺點轉換成優點。當中最難嘅係先要接受自己嘅弱點，如果唔接受，就無法去面對，更加無可能追求到完美。咁真係講就易，尤其是最在意最自豪嘅一點，好可能反倒係缺點嘅時候。

就例如我喺疫情初期，就係咁質問：「點解我咁勤力又肯學肯做也可以一年失業多次？！」但係，喺呢個大破大立嘅時代裡，勤力已經唔再係優點，係代表休息不足、缺乏思考、無咗屬於自己嘅生命節奏、容易忽略身心警號而致病，咁又點樣喺呢個沒有舊規矩可以因循嘅新時代裡面生存壯大呢？反倒係一個令人無法突破困境、追求進步嘅缺點。

其實我好懶，唔鐘意咁勤力做嘢，只係呢個特質喺舊時代係會被視為重大缺點，所以以往會迫自己去勤力。現今則反過嚟，係令我諗出好多節省各式生意成本嘅執行細節，疫情咁耐就創業咁耐，至今都仲生存得到嘅優點。

總括而言，了解自己係建立基礎嘅基礎，並不只係追求完美及成功嘅必需條件，亦係保護自身嘅重要措施。

*參考連結：

https://nypost.com/2022/12/07/woman-suddenly-drops-dead-while-working-in-shocking-video/

作者：辣椒F

想法和做人都是小辣椒，涉獵不同有趣圈子，對人生規劃和世事處理有獨到的一套看法。