最近，網絡上有三件事被人爆料出嚟。分別係，編劇一向都好易被港產片商無情剝削走數、某間以政治立場爆紅嘅連鎖超市被爆出黑幕，仲有某知名政界人物不停向左中右人士借錢不還。

相關分析及花生，實在有太多人比筆者更為擅長，無需多贅。剛好，有從事出版嘅網友在其FB帖子上好奇一問：「搞到連我呢啲圈外人都知道，係咪同什麼天象有關呢？」

好奇一查，果然有所發現：最近半月就係山羊水星逆行（29/12-18/1）嘅時候。山羊代表嘅其中一個意義係「累積」，水星逆行嘅意義則在於重新反思、清除錯誤。因此，水星一喺19/1恢復順行，溝通傳訊混亂嘅情況大幅減低，就開始有人講返啲圈內慣犯，咁就會有好多人會跟住追，因為除錯糾正就係呢段時間嘅主旋律。

是故，比較聰慧嘅人就會主動去梳理往日謬誤並加以改正，愚昧或不知改過嘅人則特別容易搞出錯漏或者係被爆料。因為呢段時間裡，大家就係會特別著眼於「過往累積的錯誤」，過去某些不知不覺、視而不見或被包容忍讓嘅壞行為或壞文化，忽然間呢堆黑歷史就會被大家拎出嚟抨擊，希望將類似嘅人事物加以排除。

喺呢啲事情上面，我哋要學到嘅，並唔係一出咩事就衝埋去講多一份刷存在，而係要有主動清除自我思維、行事及工作謬誤之自我提醒。否則，輕則喺某段時間內頻繁出錯，重則要被迫面對外面環境所產生嘅強烈負面反饋，甚至斷送名譽及前途。

有人質疑，筆者身為基督徒，點解又可以睇星象呢？其實，天上繁星係宇宙嘅一部分，係一個又一個嘅能量結構並且互為影響。中醫亦作為一種醫學，同樣有「天人合一」嘅概念。亦即係話，天父擺啲星喺度自有深意，透過星象去解讀其之於個人及社會嘅影響就係一種科學，就同醫學之中會解讀人體各種演進與病變係一樣。

總括而言，每年都會發生三至四次嘅水星逆行，就係神要透過各種出錯嚟提醒我哋要糾正自身謬誤，所謂特別當黑就即係需要改嘅錯處實在好多，應該冷靜地面對及改善，以免問題累積爆發，悔之以晚。

作者：辣椒F

想法和做人都是小辣椒，涉獵不同有趣圈子，對人生規劃和世事處理有獨到的一套看法。